Anna Lísa, Áslaug María og Dagný ráðnar aðstoðarmenn ríkisstjórnarinnar

Anna Lísa Björnsdóttir hefur verið ráðin aðstoðarmaður ríkisstjórnarinnar. Einnig hefur verið gengið frá endurráðningu Áslaugar Maríu Friðriksdóttur og Dagnýjar Jónsdóttur sem aðstoðarmanna ríkisstjórnarinnar.

Anna Lísa hefur undanfarin ár gegnt starfi framkvæmdastjóra þingflokks Vinstrihreyfingarinnar – græns framboðs og var áður samskipta- og viðburðastjóri VG. Hún stundaði meistaranám á árunum 2004-2006 við National Film & Television School í Bretlandi við framleiðslu kvikmynda. Hún var aðstoðarframleiðandi BBC á Íslandi á árunum 2006-2017 og framleiðandi hjá Sagafilm frá 2005-2006. Anna Lísa er einnig stofnandi Gley mér ei styrktarfélags og Sorgarmiðstöðvarinnar.

Anna Lísa Björnsdóttir

Áslaug María hefur verið aðstoðarmaður ríkisstjórnarinnar frá október 2023. Hún er með MSc-próf í vinnusálfræði frá Háskólanum í Hertfordshire í Bretlandi og BA-próf í sálfræði frá Háskóla Íslands. Áður starfaði hún m.a. sem sjálfstætt starfandi ráðgjafi á sviði stafrænna mála og mannauðsmála, var borgarfulltrúi og varaþingmaður fyrir Sjálfstæðisflokkinn auk þess að starfa sem sérfræðingur í félagsmálaráðuneytinu.

Áslaug María Friðriksdóttir

Dagný hefur verið aðstoðarmaður ríkisstjórnarinnar frá apríl 2022. Hún er með BA-próf í íslensku frá Háskóla Íslands og hefur m.a. starfað sem sérfræðingur á upplýsinga- og kynningarsviði Kennarasambands Íslands, sem verkefnastjóri á kynningar- og markaðssviði Eimskips og sérfræðingur á markaðssviði Arion banka. Þá var hún þingmaður Framsóknarflokksins 2003-2007.

Dagný Jónsdóttir